Stelsel Besonderhede

Vandag is M&T steeds ‘n familie-besigheid. Pieter Theron, en sy dogter Marisa van Zyl staan aan die stuur van die bedryf, en hul eerste oorweegrede is altyd om die produk so koste-effektief as moontlik te maak vir hul kliënte.

Die M&T toerusting is hoofsaaklik ontwerp vir veesuipings. Dit is belangrik om te bepaal watter M&T stelsel ʼn gegewe boorgat die beste sal dien. Die M&T 45-meter stelsel is voldoende vir enige watervlakke vlakker as 45 meter. Sodra watervlakke dieper as dit gaan is die M&T 60-meter stelsel die antwoord. Maak baie seker dat dit wel die geval is.  Dit is ons ondervinding dat meeste boorgate binne 45 meter water lewer.

Die M&T Drukkop-stelsel word gebruik om water te lig, tot 10 meter oor een kilometer. Sien die patent onderstaande vir nadere besonderhede.

Die gebruiker van die M&T stelsels moet sy hul eie plastiese pype aanskaf, wat geredelik beskikbaar is by koöperasies. Sien ʼn volledige lys van benodighede onderstaande:

• Die gepaste M&T stelsel (Te koop by BKB. Kontak ons gerus indien jy nie ‘n BKB kooperasie naby jou het nie.)
• SABS pype of SABS standaard pype (buitepyp met buitemaat 63mm, binnemaat 55mm; binnepyp met buitemaat 50mm, binnemaat 40mm) (Te koop by BKB asook ander koöperasies en industriële verskaffers.)
• ‘n Koordlose boor, 8mm boorpunt en 25mm hout-boorpunt
• 8mm bout & moertjie om deur die houtstang te pas
• Gasbrander en stukkie metaal om die nylon stafie se punte te smelt & smee
• Hamer en waterpomptang
• Nr. 13 Moersleutel, sluitmoersleutel en ketting- of bobbejaan-moersleutel
• Ster-punt skroewedraaier
• Ystersaag
• Maatband
• 32 mm koppelstuk vir die T-stuk en 32mm pyp om water te herlei na die dam

Daar is geen silinder nie, die stelsel vorm sy eie silinder.